هئچ قلبیده قلبیمده اولان غلغله یوخ

 

بیر چاره منه زار و پریشان دله یوخ

 

روحیم ایله جسمیدن ادوب ترک علاقه

 

 گویا کی داخی میل به آب و گله یوخ

 

دوتقون گویلی گولشن آچار گوللر آچاندا

 

بیلمم نیه گلزاریده میلیم گوله یوخ

 

بیر دامه سالوب سلسله ی زلف جمالی

 

عالمده بله دامه سالان سلسله یوخ

 

بیر یار سفر کرده گرفتاریم آخر

 

دردیم اودی اوندان سورا بیر مسئله یوخ

 

بیر یوسف گمگشتنین آوارسی ام من

 

کاشانه ی صبریم تالانوب حوصله یوخ

 

آخر نقدر من سوروشوم قافله لردن

 

آیا نه خبر واردی دسینلر هله یوخ

 

دنیا ده گونه کار مگر عاشق اولانماز

 

بو باریده کی جای مذمت دله یوخ