قاراسیز آغلار اولانماز
قاراسیز آغلار اولانماز دره سیز داغلار اولانماز اولوسیز ساغلار اولانماز
گرک هر بیر گوزله بیر دانا چیرکینده یارالسین
بیری انسین یره گویدن بیری عرشه اوجالانسین
بیری چالسین ال ایاق غم دنیزینده،بیری ساحلده سئوینجیله دایانسین
بیری ذلت پالازین باشه چکیب یاتسادا آنجاق،بیرینین بختی اویانسین
بیری قویلانسادا نعمتلره یئرسز،بیری ده قانه بویانسین
آی آدامسیز سوری آدلی،ساچلاریندان دارا باغلی!
نئله مک ائیش بئله گلمیش؛چور گلنده گوله گلمیش
فلکین ایری کمانینده اولان اوخ آتیلاندا دوزه دگمیش
دلسیزین باغرینی دَلمیش؛ایری قالمیش دوزو ایمیش
اونو خوشلار بو فلک:ائل ساراسین سئللر آپارسین
بولبول حسرت چکه رک گول ثمرین یئللر آپارسین
قیسی چوللر ده قویوب لیلینی محمیلر آپارسین
خسروئی شیرینیله ال اله وئرسین،فرهادین
قامتین اگسین
باخاراق چرخ زامان نشئیه گلسین
کئفه دولسون،سوری لار سولسادا سولسون
بیری باش یولسادا یولسون
سیسقا بیر اولدوز اگر اولماسا اولدوزلار ایچینده بو
سما ظلمته باتماز
داش آتان کول باشی قویموش داشینی اوزگیه آتماز
سن یئتیشسن هدفه اوندا فلک مقصده
چاتماز،داها افسانه یاراتماز
سوری ای باشی بلالی زامانین قانلی غزالی
سوری بیر گوشدی خزان آیری سالیبدور یوواسیندان
ال اوزوبدور آتاسیندان
جوجه دیر حیف اولا سود گورمییب اصلا آناسیندان
او زلیخا کیمی یوسیف ائیین آلمیر لیباسیندان
بونا قانع دی تنفس اده بیر یار هاواسیندان
درد وئرن درده سالوب آمما خبر یوخ داواسیندان
آغلایوب سیتقایاراق بهره آپارمیر دوعاسینان
او بیر آئینه دی رسام چکوب اوستونه زنگار اوندا،یوخ قدرت گفتار
اوزی چیرکین دیلی بیمار،گنج وقتینده دل آزار
گوره سن کیم دی خطا کار،گوره سن کیم دی خطا کار؟